ရခိုင်ဂေါင်းတုံးဗမာသုံး

လုပ်လိုက်သမျှအလုပ်က ဗမာမြန်မာအတွက်စီ ဖြစ်လားရေ...။

မဆလခေတ်မှာ ရခိုင်ဘုန်းကြီးတပါး ကောင်းနာမည်ကြီးကျော်ကြားခရေ...။ ဇာတိက ပေါက်တောမြို့နယ် တောင်ချောင်ရွာက ဖြစ်ပါရေ။ ဘွဲနာမည်ကိုက မပြောပျာ ရခိုင်လူချမ်းသာတိဘက်မှာ မျက်စောင်းထိုးမခံချင်လို့ပါ။ ဇံရရေ...လတ်..။ ဆွမ်းခံလားကေ ဇံနန့်ကြွတော်မူရေလို့ ပြောကတ်ပါရေ။ နေ၀င်းကိုယ်တိုင် ကိုးကွယ်ရေဘုန်းကြီး...ဘုရင်ကိုးကွယ်ရေဘုန်းကြီးပ...။ တရက်နိ ဘုန်းတော်ကြီးဆွမ်းခံဖို့ ဇံနန့်ကြွတော်မူရေမှာ ခြီသလုံးမှာ ကျုပ်တိကပ်ပါလတ်တေဆိုကာ................(သူများပြောစကားရာ)။ ဘုရားတည်ကေ လက်ညှိုးထိုးလို့စီ တည်ပါရေ..။ ဗုဒ္ဓတခါလေ့ လက်ညှိုးထိုးညွှန်ပြရေလို့ တခါလေ့မဟိခလို့ ပညာသျှင်တိက သုံးသတ်ကတ်ပါရေ။ ယင်းဘုန်းကြီးလက်ထက်ရောက်ခါမှ ဗုဒ္ဓလေ့လက်ညှိုးထိုး အလေ့အထဖြစ်လားပုံပေါ်ရေ....။


မဆလခေတ်တခေတ်လုံးရခိုင်ပြည်ကို နံနှိပ်ခရေ....။ ဆရာကြီး ဦးသာထွန်းအသိ......။ ထိုဘုရားကိုလား နံနှိပ်၊ ဒေဘုရားလား နံနှိပ်.....။ ကောင်းကောင်း ပြည်ဆူခပါရေ...။ ကိုးကွယ်ကတ်တေလူတိက အသျှင်ကြီးကြွလာရေ အသျှင်ကြီးကြွလာရေလို့စီ သုံးနှုန်းကတ်စွာကို တွိရပါရေ..................။

န၀တ၊ နအဖခေတ်မှာလေ့ ယင်းပိုင် နိုင်ငံကျော်ရခိုင်ဘုန်းကြီးတပါး ပေါ်လာရေ။ မီးတိုင်းကို ဖြေနိုင်ရေ။ လိုတိုင်းကို ရရေလို့ ပြောကတ်တေ။ နောက်လိုက်တိက ဇံရစွာထက်ပိုလို့ ရဟန္တာအထိ တင်စားခေါ်ဝါကတ်ပါရေ။ ခိန်ညွတ်ကိုယ်တိုင် ရွှီကျောင်းဆောက်လို့ ကိုးကွယ်ရေလတ်.....။ ရခိုင်တပြည်လုံးမှာ ဟိဟိသမျှ သမိုင်းဝင်စေတီ၊ သမိုင်းဝင်ဘုရားအဆောက်ဥတိ ပြန်လည်မွန်းမန်ရေဆိုပြီးကေ ဟိသမျှသမိုင်းဝင်ဌာပဏာတိကို ယူရေ။ နောက်ဆုံး ရဲကျော်သူသွန်းလုပ်ထားခရေ မဟာမုနိဘုရားကိုလေ့ မယူမခိန်ညွတ်နန့် မင်္ဂလာဆောင်ပီးလိုက်တေ။ ရခိုင်ပြည်မှာ ဘုရင်မပေါ်ရအောင်လို့ နံနှိပ်တေဆိုကာ.......။ အညတရ မျိုးစောင့်သင်္ဃာတော်တိ အသိပါ။ သမိုင်းပညာသျှင်တိလေ့ အသိပါရာ မလား။

၁၉၉၄ ခုနှစ်က အနောက်တိုင်းစစ်ဌာနချုပ်ကို ခိန်ညတွတ်လာလည်ရေခါ ``ရခိုင်ကို မပူကဲ့၊ ရခိုင်ကိစ္စကုလားနန့် ဂျောင်ထိုးထားလိုက်`` လို့ အနောက်တိုင်း တိုင်းမှုကိုပြောခရေ။ များမကြာလိုက် ဗမာမြန်မာဘုန်းကြီးတပါး စစ်တွေမြို့ရောက်လာရေ။ အလိုတော်ပြည့်ကျောင်းမှာတည်းရေ။ နာစီရွာက ကောက်ညင်းပေါင်းရောင်းရေ ကုလားမဘက်မှာ ကောက်ညင်းပေါင်းဝယ်စားရေ။ ဖဲသာမပီးဘဲ ထွက်လားရေ။ ကုလားမက ဖဲသာတောင်ရေ။ မပီး။ မပီးကေ ကုလားမက ဘုန်းကြီးကို သတ်တေ။ အသူလွန်လေ။ ရခိုင်သားတိ မစိမ်းစာခ။ ဘုန်းကြီးတိက ဘုန်းကြီးကို သတ်ရဖို့လားဆိုပြီးကေ၊ ဘာသာရေးကို စော်ကားရေဆိုပြီးကေ ကုလားကိုစတင်တိုက်ခိုက်ခကတ်တေ..။ သီကတ်ပျောက်ကတ်တေ။ အညတရရခိုင်သားချေတိ အဖမ်းခံကတ်ရရေ။ ယင်းမှာ ခိန်ညွတ်ဗျူဟာ အသက်ဝင်လှုပ်ယှားလာရေ။ အေနိထက်ထိလို့ ပြောနိုင်ရေ။

အတွိကြုံတခုကို ပြောကြည့်မေ။ ကျန်တော်အိန္ဒိယကိုထွက်လာရေခါ၊ ကျောက်တော်မြို့ဘုန်းကြီးကျောင်းမှာ မတည်းခရပါ။ ပလက်ဝမြို့မဘုန်းကြီးကျောင်းမှာ မတည်းခရပါ။ ဒီမိုကရေစီကျောင်းသားထင်လို့။ ကျန်တော်နန့်အတူပါလာရေ ပန္ဇင်းကို သိမ်မှာအိပ်ခွင့်မပြု။ ပလက်ဝမြို့ပြင်က သာသနာပြု (ဗမာဘုန်းကြီးကျောင်း) ကျောင်းမှာ အိပ်ခရပါရေ။ ကံကောင်းလို့ အက္ကဓန္မမောင်သျှင်နန့် တွိရေ။ သရော်အိုင်ထိခေါ်လာပြီးကေ အိန္ဒိယနယ်စပ်ကို ရောက်အောင်ပို့ပီးလိုက်တေ။ မောင်သျှင်က အရေးခြင်းနန့်ထွက်လာကတ်တေ ကျောင်းသား၊ ရဟန်တိကို သရော်အိုင်ကျောင်းထိုင်ပန္ဇင်း ဇ၀ဏနန့်ပေါင်းလို့ ဘင်္ဂလာနယ်စပ်၊ အိန္ဒိယနယ်စပ်တိကို လိုက်ပို့နီကျ ဖြစ်ပါရေ။

၂၀၁၅ ရွီးကောက်ပွုအတွက် ကြံခိုင်ရေးပါတီမဲရဖို့အတွက် ဘာသာခြားတိနန့် မှိုင်းတိုက်ထားရေ အမျိုးဘာသာစောင့်ယှောက်ရေးကို အကြောင်းပြုပြီးကေ သန်းခေါင်စရင်းကိုဆန့်ကျင်ဖို့အတွက် သာသနအလံကို အိမ်တိုင်းစိထောင်ပြီးကေ ဆန့်ကျင်စွာရေ အေရာမကြီးမားရေ ညူကလီးယားဗုန်းက ဇနက်တံကို မီးတိုက်လိုက်စွာနန့် တူရေ။ ဇာဖြစ်လို့လဲဆိုကေ ဘာသာရေးဆိုစွာ အလွန်နုညံ့ရေ၊ သိမ်မွေ့ရေ၊ ထိလွယ် ပြတ်လွယ်ရေ အရာတခုဖြစ်နီလို့.................။ အေလှုပ်ယှားမှုတိနောက်ကွယ်မှာ ဗမာမြန်မာက မာစတာဗြိန်းတိ မပါလို့ ပြောနိုင်ဖို့လားကု....။ အနည်းဆုံးအဆင့် ဆက်စပ်မှုတိ ဟိနီကတ်တေဆိုစွာ လားကြည့်ခီဖို့ မလိုလို့မြင်ရေထော....။

ရခိုင်တိလုပ်သမျှအလုပ် ဗမာမြန်မာတိအတွက်ကျဲ မဖြစ်သင့်.........။

ခိုင်မြသိန်း (ချောင်းသာကြီး)
၂၈၊ ၀၃၊ ၂၀၁၄